Abhi To Kuch NaheeN Hua
Abhi To Kuch NaheeN Hua Abhi To Ibtida Hai Yeh
Abhi Woh Waqt Aayega Ke Saari Qaum Royegi
Aur Apne Dil Ke Daagh Apne Aansowoon Se Dhoyegi
Yeh Sarzameen-e-Pak Hai Ya Arz-E-Karbala Hai Yeh
Yeh Loot Maar Qatl-o-KhooN DakaitiyaaN TabaahiyaaN
Bamon Ki Zad Pe Hansti Gaati Jagmagati BastiyaaN
Bahisht Mein KahaN Se Ik Jahannum Aagaya Hai Yeh
Yeh Kis Ki Aabroo Luti Yeh Kis Ka Seena Chak Hua!!
Yeh Kon Bhayee Hai Ke Jis Se Bhayee Jaan Bahak Hua!!
Behen Ki Zinda Laash Kaun Youn Bhanbhorta Hai Yeh
Yeh Khudkashi Ki Mashk Hai Ke Jang-e-Khaana Saaz Hai
Yeh Ghaznavi Kamal-e-Fun Basoorat-e-Hayaat Hai
Jo Hum Mein JaaN-Balab Hai Woh Zameer Poochta Hai Yeh
Hum Apne Haath Hi Se Apna Jism Kaat Te Bhi HaiN
Phir Apni Hi ZabaaN Se Apna Khoon Chaat Te Bhi HaiN
Agar Hai Yeh Junoon To JunooN Ki Inteha Hai Yeh
Suna Hai Is Fasaad Mein PadosiyoN Ka Haath Hai
Hamaari Apni AasteeN Mein DushmanoN Ka Haath Hai
Khabar NaheeN Fasaana Hai Ya Amr-E-Waaqiyah Hai Yeh
Dayaar-e-Paak Mein Sada Ajeeb Silsila Raha
Zabaan-o-Dil Ke DarmiyaaN Hamesha Faasla Raha
Siyaasat-E-Watan Ka Ik Taweel Saaniha Hai Yeh
Khuda-o-DeeN Ke Naam Per Agar Yeh Qaum Aik Thi
Tamaam Ummaton Ke Darmiyaan Sab Se Naik Thi
To Aaj KyoN Hai Bad-Tareen, Kyon Baham Juda Hai Yeh!!
Sabhi Hain Is Nifaaq Ke Jawaab Ki Talaash Mein
Yeh Raaz Hai Chupa Hua Siyaasat-e-Ma'aash MeiN
Ilaaqa-Wariyat Na Qaumiyat Ka Mas'ala Hai Yeh
Shanakht Ki Har Aik Shakl Motabar Sahih Magar
Saqaafaton Ke Naam Per Yeh Foqiyat Baham Digar
Shikast Khordgi Ka Aayina Hai Aur Kya Hai Yeh
Hasab Nasab Ki Khush GumaaniyaaN HaiN Aur Aadmi
Khayal-o-Khuwaab Ki KahaniyaaN HaiN Aur Aadmi
Aur Aadmi Hai Kya? Hawa Ki Zad Pe Ik Diya Hai Yeh
Yehi Diya Bharak Uthey To Mehr-O-Maah Kuch NaheeN
Jo Bujh Gaya To Yeh Bajuz Ghubaar-E-Raah Kuch NaheeN
Magar Hum Aaj KyoN DhuwaaN DhuwaaN HaiN Sochna Hai Yeh
Watan Mein Reh Rahe Hain Aur Watan Se Waasta NaheeN
Hamaare Gird-o-Paish Aaj Koi Raasta NaheeN
Zameen Per Hai YouN Qadam Ke Zer-e-Paa Khala Hai Yeh
Mein Aik NojawaaN Ki Guftugoo YahaaN Raqam KarooN
Meri To Aankh Num Hai Aap Ki Bhi Aankh Num KarooN
Woh Keh Raha Tha Aap Ke Gunaah Ki Saza Hai Yeh
Woh Qaum Jo Bikhar Chuki Woh Kya Simat Sakegi Ab?
Yeh Nafraton Ki Hai Khaleej, Khaak Pat Sakegi Ab
Yeh Aap Hi Ke Naqsh-E-Paa Ka Aik Silsila Hai Yeh
Buzurg Apne FaisloN Pe Sharmsaar HoN Na HoN
HaqeeqatoN Se Unke Khuwaab Hamkanaar HoN Na HoN
HameiN Jo Aap Ne Diya Woh Kaasa-e-Gada Hai Yeh
Kaha Gaya Tha Yeh Watan Bana Hai Sab Ke Waaste
To Aaj Hum Pe Band KyoN Hain Zindagi Ke Raaste
Yeh Khaana JangiyaaN NaheeN Jihaadat-E-Baqa Hai Yeh
MeiN Sochta HooN Aisai NojawaaN Ko Kya Jawaab DooN?
Nazar Se Gir Chuke Jo Khuwaab Unko Kaisai Aab DooN
MeiN Kis Tarah KahooN Usai Fana Ka Raasta Hai Yeh
Udhar Hain Iqtidaar Ke Nashe Mein Choor HukmaraN
Idhar Awaam Ka Hujoom Mushtayil Sharar FashaaN
Aur Unke DarmiyaaN Watan Ka Bakht-e-Narasaa Hai Yeh
Yehi To Kashmakash Thi Jo HameiN Do-Neem Kar Gayi
Har Aik Khuwaab Cheen Kar HameiN Yateem Kar Gayi
Hamare Paas Ab Hai Kya Baqa Ka Aasra Hai Yeh
Dharak Raha Hai Dil Mera Watan Ka Haal Dekh Kar
Yeh Intishaar Dekh Kar, Yeh Ishtiyaal Dekh Kar
Khuda Bachaaye Kis Taraf Mera Watan Chala Hai Yeh
Abhi To Kuch NaheeN Hua Abhi To Ibtida Hai Yeh
By: Himayat Ali Shayer
Audio: http://mushaira.org/audio/redir.php?tp=rm&filename=himayat2.rm