﹣﹣﹣
[求Like同Share]
你入得黎睇得呢段嘢，就已經證明你係少數人入面嘅一份子。

開始做呢個計劃時我大概都估到咁嘅Page唔係好符合到大眾嘅口味，一來呢度會有好多文字，二嚟啲文字係偏向要用腦去思考，所以平時上吓Facebook輕鬆吓嘅人係唔會點理呢啲Page。所以我就更加要厚面皮咁去乞求大家嘅Like同Share。如果你係1) 認同呢個計劃嘅理念或者效果、2) 你本身都鐘意睇書、3) 你覺得Like下個Page都幾開心、4)你想幫吓我、5) 你想睇吓呢度將會有咩下場等等都好，請幫我Like 或者 Share post。惟有咁樣呢個Page先有機會去到有興趣嘅人嗰度。同埋惟有咁樣我先會有多啲動力繼續做，起碼唔會覺得自己喺度單機做傻仔。

[錯就要認，打就企定]
希望大家見到有錯就講，可以PM我亦都可以留言，唔駛驚唔好意思。錯係包括「錯字」、「錯嘅概念」、「錯嘅資料」、「錯嘅詮釋」等等。正因為呢個計劃最後係想令睇嘅觀眾得益，所以如果入面有嘢錯咗、誤導咗人，咁都違背咗我嘅原意。你每提出嘅一個意見都唔單止係比我知，亦都係比其他觀眾知。另外，如果你覺得有啲修改會令到段文字更好嘅，都不妨提出。你可以當呢度係半Crowd-source嘅計劃。

[揀書]
我揀書嘅理念大概係咁：
1）佢對人類知識或文明發展有重大意義（即係所謂嘅經典）。或
2）我覺得佢有意義或者有趣，想公諸同好。或
3）清末民初嘅中文著作。或
4）參考大家嘅提議。

呢度啲書主要都係有關哲學、政治、宗教或科學。可能間唔中會有歷史。但係文學嘅話我就真係唔太掂。

另外，呢度啲書都係已經冇咗版權嘅。所以幾乎都係舊書。你唔會喺度見到新書。

[翻譯]
另外，呢度嘅翻譯係好唔學術性嘅，而且有可能會譯得唔好、甚至唔啱。所以希望各位有識之士可以多多提點。如果以嚴復先生（1854﹣1921）所講嘅「信、雅、達」為指標嘅話，我諗呢度嘅翻譯會著重「達」，然後係「信」，最後係「雅」。我想做到嘅有兩點：1）就係大家可以好方便咁用自己語言先了解咗文本嘅大概，如果有興趣去研究旁枝末節或者想討論重大矛盾嘅話，都係用翻其他譯本好啲。2）其實我所翻譯出嚟嘅嘢都係會包含我對文本嘅詮釋，所以呢啲譯本都係表達緊一啲我自己嘅意見。而且呢度冇人幫我編輯、修改、校定，所以可能會偏向主觀都唔定。

大家明白到呢度會有嘅限制就OK。所以如果想認真研究某本書嘅話，都係睇翻原文或者睇啲經過校訂、編輯過嘅出版書藉比較好，因為會比較客觀、比較嚴謹、同埋比較準確。

[廣東話]
點解用廣東話譯呢？最初係因為想整Audiobook。咁又關Audiobook咩事呢？係因為而家市面嘅Audiobook大多都係英文（i.e. Audible 或Librivox入面嘅藏書）。而英文嘅講法同埋寫法或多或少都比較相近，同廣東話唔同。如果要整廣東話Audiobook嘅話，就咁讀一本中文書出嚟嘅效果都會好怪。所以就要先譯做廣東話，然後再整Audiobook。

不過整整吓，而家覺得譯廣東話其實唔單止係為咗整Audiobook，而係本身將啲文字譯做廣東話呢件事都有自己嘅價值。如果唔想廣東話息微，或者被人吞併，咁多多少少都要做啲嘢。

另外我自己都覺得用廣東話寫嘢其實係帶出另一種嘅文化味道，呢個係就咁用書面語做唔到嘅；或者咁講，係兩種唔同嘅感覺，就好似白話同文言兩者都會帶嚟唔同嘅閱讀感覺，雖然有時內容所講嘅係同樣嘅嘢。不過以上都係個人觀感，未有客觀引證過嘅。哈哈。