Posts

قزاز ورزاز
محمد الطيب الأمين

ــــــــــــــــــــــــــــــــــــــــــــــــــــــــــــــــــــــــــــ
يا زوله مالك بقيتي ضعيفة كده !!...
ما بتقدري
إتمهلي من قبل ما تتهوري
يا واحدة دون الناس وما بتتكرري
يا أحلى زولاً غنو ليه
ليك الدلال أدللى
أبقى البحر بدلا ليه
أبقى السما بطلع عليه
ما تهددي وتتعللي وخليهو
قلبي على العليه
وما بتقدري يا حلوة حقو تفكري
قبال قرارك تصدرى وما بتقدري
*في ناس في البلد دي ثقلين ثقالة عجيبة جداً جداً !!
*والثقالة ذاتها خشم بيوت !!
*في ثقالة فرع (الدم التقيل)..!!
*وفي ثقالة فرع (الإحباط )...!
*وفي ثقالة فرع (العوارة )..!
*وفي ثقالة فرع (الحسادة )..!!
*أنا عايز أتكلم عن الثقالة فرع (الإحباط) والثقالة فرع الحسادة!!
*قول لي كيف!!
*أوريك كيف..!
*مرات تكون مشتري ليك قميص بـ(80) ألف...!
*قميص يكون ماركة..!
*قميص حدث!!
*يقوم يقابلك واحد في الشارع يقول ليك قميصك ده مافي منو رجالي!!
*يقول ليك في إشارة خبيثة إلا أن قميصك هذا نسائي...!
*في نوع تاني من الناس..!
*أنت تكون ماشي مع حبيبتك في الشارع يقابلك ويقول ليك مالك بقيت ضعيف كده!
*عيان ولا شنو!!
*يعمل ليك نفسيات..!
*لما تبقى ضعيف أول حاجة الناس بتقول أنت عيان !!
*يقول ليك مالك بقيت ضعيف وهو عارف أنو جون سينا جاي الخرطوم..!
*مره بتذكر مشيت لي عرس في نادي الضباط..!
*وأنا داخل على النادي في بت حلوة جداً دخلت قدامي ومعاها أخوها الصغير!
*البت رغم أنها بسيطة في اللبس إلا أنها من نجوم الحفلة!!
*بتذكر كانت لابسه بنفسجي فاتح!!
*المهم..!
*البت دي دخلت النادي وهي ماشة بين المعازيم في ثلاث بنات وقفنها...!
*ثلاث بنات بعرفنها...!
*وقفت ليهن واتشابكن سلام وعناق..!
*واحدة من الثلاث بنات ديل قالت للبت يا فلانة بقيتي ضعيفة كده !!
*الثانية قالت ليها..والله وأنتي جايه من هناك ماعرفناك أنتي عيانة ولا شنو!!
*شوف الثقالة دي..!
*البت الثالثة قالت ليها..والله يا فلانه وشك ذاتو بقى تعبان وعندك سواد تحت العين أنتي ما قاعدة تنومي ولا شنو!!
*الثلاث بنات ديل بصوت واحد قالن ليها..!
* والله يا فلانه اتبشتنتي..!
*البت مسكينة تسمع في الكلام ده وتبلع ريقها..!
*مسكينة عملن ليها نفسيات!!
*جاية الحفلة بمعنويات عالية لكن البلابل ديل عملن ليها نفسيات!!
*البت بعد أن انكسر خاطرها اصطحبت أخوها ومشت قعدت في الكراسي الورا!
*بعد داك أنا بقيت متابع البت دي..!!
*الزولة دي بعد الكلام ده من الكرسي ما قامت لا رقصة ولا باركت للعروسين!!
*الزولة دي حتى الكاميرا لما تجيبها هي بدنقر وبتتهرب من الكاميرا..!
*الحفلة انتهت الزولة دي طلعت وهي محبطة جداً ...!
*شدة ما محبطة ضربت أخوها كف..!
*ضربتو كف بدون سبب..!
*طبعاً البنات تقول ليهن أي حاجة لكن ما تقول ليها بقيتي ضعيفة!!
*البت لو قلت ليها بقيتي ضعيفة ممكن تكرهك جد جد..!
*والعجب لو قلت ليها وشك تعبان وعندك سواد تحت عيونك!!
*القيامة بتقوم..!
*خاصة لو البت خاشة ليها في مشروع تسمين!!
*بت تكون ليل ونهار قاعدة تشرب مديدة وأنت تجى تقول ليها بقيتي ضعيفة بتكرهك بتكرهك..!
*هسه البت بتاعت نادي الضباط دي لا ضعيفة ولا وشها تعبان لكن مع ذلك صدقت كلام الثلاث بنات !!
*وأنا متأكد البت دي اليوم داك بتكون ما نامت!!
*والثلاث بنات ديل بيكونن شغالات إحباط بس!!
*دي شغلتهن حسادة شديدة!!
*طبعاً كلامي ده عن بعض البنات وليس كلهن!!
*يا أستاذة البدره البتعمليها دي ما ماشة مع لونك ..!
*و.........و............
*وشغلن قلبي لمن باص الرصيرص فات..!

See More
Posts