ثانيًا: "القوس" ضروريّة، لانها الجهة الوحيدة بفلسطين التاريخيّة، اللي بتشكّل ملجأ بديل لملاجئ تل أبيب لكُل شاب مثليّ فلسطيني مقموع ومضروب ومهدّد بفلسطين. "القوس"، هون بتلعب دور الدولة ودور الحضن ودور البيت لهاي الشباب والصبايا، اللي لولا "القوس" بكون الملجأ تبعهم تل أبيب ومدن الاستعمار المحتضنة واللي بتحمل وبتوخذ ع العالم الشباب تحكي قدّيه العرب قامعين، وقدّيه دولة اليهود هي ملجأ اجتماعيّ وحقوقيّ. "القوس" واقفة هون، تمنع هذا الانحدار وتمنع ضحايا المجتمع يصيروا أبواق للاستعمار في العالم.

ثالثًا: مجتمعنا زي أي مُجتمع ثاني بالعالم، فيه مثليين وفيه كُل إشي. إنّك تقمع وتقتل وتطرد، هاي مصيبة كبيرة، وهذا اللي بفتّت نسيج المُجتمع ومش "القوس" اللي بتقول لهاي الشباب تعالوا في بيت فلسطيني يسمعكم ويحكي معكم ويحتضنكم.

رابعًا والمُهم كثير: كان الأشطر بالشُرطة الفلسطينيّة تمنع البضائع الإسرائيليّة وتجّارها مثلًا بالضفّة الغربيّة، ولّا توقّف مؤسسات التطبيع، ولا تلاحق صفحة "المنسّق" وتتابعها كصفحة ومؤسسة كُل ثانية عم تدق الأسافين في هذا المجتمع من الفساد للخلاف للمشاكل للتصاريح. والأهم، كان فيها تلاحق الفساد ولّا المشاكل ولا السرقة ولّا العمالة ولّا غيره وغيره، بدل ما نازل تلاحق "القوس" اللي هي مؤسسة ولا مرّة، كانت أقل من ضروريّة بمجتمع كُل يوم فيه قتل وقمع وخرق.

"القوس" ضروريّة أخلاقيًا وسياسيًا واجتماعيًا...