Чарговыя ўгодкі легендарнай перамогі войска Вялікага княства Літоўскага пад Воршай адзначаныя на Крапівеньскім полі.
КРАПІВЕНЬСКАЕ ПОЛЕ
На Крапівеньскім полі вятры....
Палыны. На далоні патры −
Загарчыць. Торгне сутаргай, болем.
Тут вякі праплылі, як віры па Дняпры,
За палкамі палкі
тут прайшлі ваяры,
Змагары, што накрытыя полем.
На Крапівеньскім полі трава. Крапіва.
Тут крыві напілася Масква,
Татарва з крыжакамі ў хаўрусе...
Тут над імі
усімі
паўстала Літва –
І абрынулася ў Беларусі!
Дзе ж мы дзелі
літоўскую долю?
Веліч продкаў? Іх вольную волю,
Што яны аплацілі крывёй?
Як гарчыць палыном на Крапівеньскім полі −
І пячэ крапівой!..
