بالزمانات بس طلعو تلفونات النوكيا باندا و الدمعة و ايام ما كنا ننقل النغمات عبر البلوتوث كان في ظاهرة اسمها نعيم الشيخ كنت كل ما اسمع حدا حاطت غنية الو هيك يكزبر بدني بس استحي احكي هل شي لانو كنت حس معظم المحيط اللي عايش فيه بيحبو و يمكن بيين اجدب قدامهن ...
من كم شهر ظهر تجميع صيني ل نعيم الشيخ ... اسمو وديع الشيخ ... مطرب لهلوب خابط نص اغاني نعيم و النص التاني اناشيد للحزب و كم طرطوقة من هل طراطيق و فايت فينا بالعرض ...
صراحة يعني اخر همي شو بتقولو عني بس مش مقبول يا خيي .….. المشكلة مش بأغانيه البلا طعمة ولا بألحانو اللي بتعمل اسهال بالدينان ... المشكلة انو ما عاد عم يتهدى !!! ولك من كترة الخس الزايد صار ينزل كوڤرات تلفون و يطلع يقول انو اللي بيحبوه عم ينزلو و يشتروهن !!! او يمشي و معو اربع جيبات مفيمة و خمس ست بوديغاردية ليضلو وراه احسن ما يموت و ينشرح صدرو و تنقطش بطة رجلو !
ما بعرف مين السبب بتفشي هل ظواهر الغريبة ... بس حدا يقلو انو زياد الرحباني بعظمتو ما معو مرافق ... ملحم بركات كان ينزل يشتري اللحمة ... ولك فيروز الاسطورة قاعدة ببيتها و عم تطبخ لولادها ... روق يا ودوعة روق ومش محرزة تعمل فيها جون ترافولتا لانو اللي عم تستعرض ادامو مرة بموكب مرة برزمة مصاري عم تعدها ... هوي شعب معتر محلوق منتوف اهلو لا هامو شو عم تطلع ولا قادر يشبح متلك و يجيب جيبات و فيمه ... غني و اعمول اللي بتحبو ... بس ارحمنا من هل تفاهات !