1. Увесь гэты час мы каардынаваліся з Ігарам і Аляксеем Дзікавіцкім (як з мэнэджэрамі Белсату, а не як з журналістамі!) у справе абароны Белсату, адвакатавалі за яго захаванне, перадавалі ўсе іх просьбы і пункты палітыкам. І Ігар, і Аляксей могуць гэта пацвердзіць. Менавіта яны першымі прыйшлі да нас па дапамогу.

2. Нам было важна захаванне Белсату як брэнду і захаванне каманды. І Белсат быў захаваны. Гэтыя пункты мы адстойвалі.

3. У самым пачатку крызісу мы сапраўды, з дапамогай арганізацый беларускай медыйнай супольнасці (гэта могуць пацвердзіць іншыя людзі), падрыхтавалі спіс медыяменеджэраў з 15 чалавек. У яго ўваходзілі рэдактары вялікіх беларускіх выданняў, а таксама прадстаўнікі Белсату, у тым ліку Дзікавіцкі і Кулей. Неўзабаве пасля гэтага прызначылі менавіта Дзікавіцкага. Ці было гэта звязана з нашымі прапановамі—сказаць не магу, бо ТВП вяло перамовы самастойна.

4. Пра ліст. Была спрэчная ініцыятыва з калектыўным лістом—і па часе, і па змесце, і па тым, як ён быў арганізаваны і напісаны. Мы трымалі дыстанцыю, бо якраз гэта выглядала б як умяшальніцтва нібыта мы ім нешта дыктуем.

5. Трэба разумець, што Белсат юрыдычна—гэта частка Польскага грамадскага тэлебачання. У іх дзейнічаюць унутраныя правілы і распарадкі. Рэформа Белсату была часткай агульнай рэформы TVP.

6. Ні прызначэнне Дзікавіцкага, ні прызначэнне Коўшык з намі не ўзгаднялася. Гэта было суверэннае рашэнне Польскага тэлебачання (пра ролю МЗС мне невядома).

7. У інтэрв’ю Ігар распавядае чуткі, маўляў, усё таму, што Офісу не падабалася, што Белсат быў занадта незалежны. Але Белсат заўсёды быў вельмі прыязны і пазітыўна асвятляў працу Офісу. І Ігар, і Сяргей і Аляксей, і ўвесь Белсат былі вельмі прыязнымі да нашай працы. Таму логіка незразумелая. А што задавалі нязручныя пытанні—гэта нармальна і ўсе іх задаюць. Гэта праца журналістаў.

8. Пра сыход Аліны. Ціханоўская ўвогуле не вельмі хацела яе адпускаць, бо Аліна закрывала ключавы напрамак працы ў Кабінеце. Таму намёкі пра спробу "прызначэння Аліны Офісам" выглядаюць беспадстаўна.

Калі патрэбныя дадатковыя ўдакладненні ці ўзнікнуць пытанні—звяртайцеся.

Калі БАЖ можа ацаніць, ці было ўмяшанне палітыкаў ў рэдакцыйную палітыку—мы будзем толькі вітаць такую ацэнку і расследаванне.